Umurusiya Viktor Bout arahakana ko yagurishije intwaro ku Rwanda

posted on Oct , 12 2010 at 17H 15min 18 sec viewed 19937 times

Viktor Bout, Umurusiya ukurikiranweho gucuruza intwaro mu buryo butemewe n’amategeko mu rwego rw’isi arahakana ko atigeze agurisha intwaro ingabo zahoze ari iza FPR ndetse na leta ya Yuvenali Habyarimana mu 1990.

Victor Bout yahakanye yivuye inyuma ibyo birego ahubwo avuga ko intwaro yinjizaga mu Rwanda ari izo yabaga agemuriye ingabo z’Abafaransa zari mu cyiswe Operation Turquoise mu gice kimwe cy’icyahoze ari Perefegitura ya Kibuye, Cyangugu na Gikongoro nyuma y’urupfu rwa Habyarimana. Iyi operation yakozwe n’ingabo z’U Bufaransa zavugaga ko zigamije gufasha abakuwe mu byabo n’intambara, ariko Leta y’ U Rwanda yo ikaba yemeza ko bari bagamije gutorokesha ingabo ndetse n’interahamwe zari zimaze koreka imbaga y’Abatutsi muri 1994.

Mu guhakana cyane ibyo ashinjwa yakomeje avuga ko ibihugu bya Afurika aribyo bishobora gucuruza intwaro hagati yabyo, aha yatanze ingero avuga ko Angola yacuruje intwaro kuri Congo ndetse n’ahandi. Yavuze ko intwaro z’Abarusiya zihenda cyane ku buryo igihugu cyo muri Afurika kitapfa kwigondera ibiciro byazo. Gusa yongeyeho ko imbunda zo mu bwoko bwa Kalashnikov zikorwa n’Abashinwa zo zikigaragara muri Afurika, izo zikaba arizo zihendutse.

Usibye guha intwaro Abafaransa bari mu Rwanda, yemeye ko ngo yanakoraga ibikorwa by’ubwikorezi aho yatwaraga Abafaransa muri Operation Turquoise, kandi ngo asanga nta cyaha kiri muri ubwo bucuruzi.

Viktor Bout w’imyaka 43 amaze imyaka 2 n’igice afungiye mu gihugu cya Thailand, guverinoma ya Leta Zunze Ubumwe za Amerika ikaba iri gusaba ko yazanwa mu nkiko zo mu mujyi wa New York, aho agomba gukurikiranwaho ubufatanyacyaha mu gushaka kwica abaturage ba Amerika, hakaba hakiri kubura gusa umukono wa Minisitiri w’Ubutabera wa Thailand ngo uwo mugabo yoherezwe muri Leta Zunze Ubumwe za Amerika.

Foto: DSV

SHABA Erick Bill