Kuri uyu wa kane tariki 14/10/2010, polisi y’igihugu yahagaritse Ingabire Victoire, kuri ubu akaba ari ku biro bya Polisi y’Igihugu bishinzwe kugenza ibyaha (Criminal Investigations Department/ CID).
Amakuru dukesha RNA avuga ko uwo muyobozi w’umutwe wa politiki FDU-Inkingi utaremerwa n’amategeko y’u Rwanda, yari amaze iminsi avuga mu itangazamakuru ko abashinzwe umutekano bari bamaze iminsi baragose urugo rwe. Muri bo ngo hakaba harimo abambaye imyenda y’akazi bafite n’imbunda, abandi ngo bakaba bambaraga gisivili. Ibyo polisi ikaba yabihakanaga, ivuga ko itagose urwo rugo.
Twabibutsa ko Ingabire Victoire yigeze nanone gutabwa muri yombi na polisi y'igihugu, hari kuwa Gatatu tariki 21/4/2010, kubera ibyaha yaregwaga birimo gushishikariza abagize imitwe y’iterabwoba kurikora, ivangura n’amacakubiri hamwe n’ingengabitekerezo ya Jenoside. Nyuma yaje kurekurwa by'agateganyo, ubu akaba agikurikiranwa n'inzego z'ubutabera, aho atemerewe gusohoka mu gihugu.
Umuvugizi wa Polisi y'Igihugu, Superintendent Eric Kayiranga yatangarije BBC ko Ingabire yafashwe kuko ashinjwa ibindi byaha bishya birimo kugura no gutanga intwaro ku mutwe w'iterabwoba witwa Coalition of Democratic Forces (CDF), ngo akaba kandi yanakoranaga na Major Vital Uwumuremyi wo muri FDLR wafatiwe ku mupaka w'u Rwanda na Congo kuri uyu wa Gatatu.
Inkuru bifitanye isano:
-
Ingabire Victoire yatawe muri yombi na Polisi y'igihugu
posted on Apr , 21 2010 at 16H 05min 04 sec
Foto: time.com
Kayonga J