Ukraine: 37 bahasize ubuzima mu mpanuka ya bisi yagonganye na gari ya moshi
posted on Oct , 12 2010 at 14H 07min 33 sec viewed 1201 times
I Kiev mu murwa mukuru wa Ukraine, kuri uyu wa kabiri imodoka yo mu bwoko bwa bisi yari yuzuye abagenzi yagonganye na gari ya moshi. Iyi mpanuka yahitanye abagera kuri 37 naho 12 barakomereka bikabije nkuko bitangazwa na polisi.
Umuvugizi wa Minisiteri y’ubutegetsi bw’igihugu Yevheny Kravets yatangarije itangazamakuru ko iyi mpanuka yabaye mu rukererera rwo kuri uyu wa kabiri, hafi y’umujyi muto wa Marhanets mu karere ka Dnipropetrovsk, nyuma yaho iyi bisi yirengangije ijwi ryayimenyeshaga ko hari gari ya moshi irimo iza, mu gihe yagiraga ngo yambukiranye umuhanda nibwo yateje impanuka.
Kravets yakomeje atangaza ko ubutabazi bw’ibanze buherekejwe n’imiti ndetse n’abakora iperereza kuri iyi mpanuka bahise bahagera bidatinze, anongeraho ko abakomeretse bamerewe nabi cyane.
Impanuka zo mu mihanda muri iki gihugu ziramenyerewe cyane kubera ko yaba imihanda ya gari ya moshi cyangwa iy’imodoka itameze neza ndetse n’abashoferi bakaba bakunze kugaragaraho kutita neza ku mategeko yo mu muhanda.
Fabrice KWIZERA
|